http://www.htmltemplates.net

Versloaving (door Dineke Hulshof)


Mien verhoaltje gait over versloaving.

Ie waiten netuurlijk wel, dat er hail wat soorten versloaving binnen.
Neem nou b.v. drugs. Dat vind ik den ook ain van de slimste soorten van
versloaving. Zoas je dat soms ook in kraande lezen of op t.v.zain,
nou, nou, gebruukte spoiten, overdosis, den denk ik: 'tzal joent mor wezen.
Ik heb der in mien direkte omgeving gelokkig nog nooit wat mit te doun had.
En ik hoop dat ik der ook nooit wat mit te doun krieg.


Den nuim ik alcoholversloaving. Nou mot ik zeggen, dat ik zulf
ook groag een pilsie drink. Veur de gezellighaid.
Ik heb er gain muite mit om der oaf te blieven as ik gewoon 's avonds thuus bin.
Mor gon ik woar argens hin, of krieg ik visite, den
neem ik gain spa, mor drink ik een lekker flessie bier.
Mor hou veul binnen der nait, dei der gewoon nait oaf blieven kinnen.
Dai smoesies goan bedinken om mot nait tou te geven huiven,
dat ze der nait meer zunder kinnen. Stoer om der weer oaf te kommen, zo'n versloaving.


Een aander versloaving is: gokken. Dat is echt wat van de letste joaren.
Je zain de gokkasten tegenwoordig overaal stoan, in café's, kantines, cafetaria's.
Eerst werden ze overal touloaten, mor nou het uut de haand lopt en er
aal meer gokversloafden kommen, veuraal onder de jeugd, nou motten de
gokkasten overaal weer vot.
Ik vind een goud ding. Want dizze versloafden zeggen net als
alle aanders: “gain muite mit, kin der zo mit stoppen.”
Mor het gait allemoal gelieke stoer.


Roken, een hail aander verhoal, mor net zo versloavend.
Mor doar is van alles veur te kriegen om der oaf te kommen. Kauw­gom,
pleisters, je kinnen der zulfs veur noar een antirook­cursus goan.
Den ist mot net woar je in geleuven. Want der maggen nog zoveul hulpmiddeltjes wezen,
je motten het toch allemoal zulf doun. Der binnen ook minsen dei zeggen: “ik heb
mien principes, ik wil roken!” Elk zien zin.


Eten en nait eten. Ook weer zowat.
Aine dei moager is, wil der zo groag een poar kilootjes bie hebben.
Dei te zwoar binnen (doar heur ik ook bie) willen zo groag oafvallen
en binnen heur leven lang op dieet.
1 kilo der oaf, 2 kilo der bie. En doar is ook zoveul veur te
kriegen. Pillen, druppels, moaltiedvervangers, joa zulfs
zooltjes. Ik snap nait, dat je deur zokke zooltjes in schounen
te doun, oafvallen kinnen. Want ieder pondje gait volgens mie
nog altied deur het mondje.


Ik ben sinds twee joar ook versloafd.
Nee, nait aan drugs of de draank, ik gok nait en roken dou ik al
sinds een dik joar nait meer. En ik hoop dat ik nog es een poar kilo kwiet wor.
Nee, mien versloafing is een hail aander geval. Doar kom ik
nooit weer oaf. Moar het slimste is, ik wil der ook nooit meer oaf.
Gelokkig binnen der veul meer zokke minsen as ik, dei net zo
versloafd binnen. Toun ik nog nait versloafd was en ik aandere
minsen der over heurde, docht ik: nou, een beetje overdreven nait.


Mor nou ik zulf zover bin, mout ik mie aalgedurig inholden, om
nait te enthousiast te doun. Want den kin een aander wel
dinken, wat een overdreven mins, net zoas ik weleens dochte.
Van mien versloaving wor je nait zaik, wel is een keer muide.
Dat dou ik miezulf netuurlijk aan. Dat wait ik wel. Mor van
dizze versloaving krieg je nooit genog. Je willen der elke dag
van genieten. En dat dou ik ook. Mit volle teugen.
Dizze versloaving het ook een noam:


ESTER

mien klaindochter


En ik bin veur heur: versloafde OPOE


bron: Dineke Loots, Muntendam.  (1e prijs Menterwolmer schriefwedstried 1996)