http://www.htmltemplates.net

Mien schoule (Woarom t zo laank duurde) - door K.J. Looijenga


t Gebeurde ais in Muntendam
Wat ik joe hier vertel.
Doar haar je n haile grode schoul
Mit twaalf lokoalen wel.


In ain van dij lokoalen nou,
Doar gong ’t soms vrolek heer
Nait, dat doar gain odder was
Nee, ales luip as smeer.


De meester sprong mit kinder om
O, wat n lust was dat!
En as ’t extroa best es gong
Din pruit hai ook wel plat.


Ain ding von meester laang nait mooi
Dij reuk soms in de klas!
Het was bie zetten gain spier aans
Of ’t n grode swienhok was!


De meester zee dat ook rioal:
“Wel het hier weer odeur?
Wel het de stobbe van de klonjevlezze of
Wel brengt mie weer dij geur?”


De jongs wazzen der al dresseerd
En ’n man of vieve, zezze,
Ruipen aalmoal tougelieks:
“Jurrie het de stobbe van de vlezze”.


“Jurrie, goa moar op de gaange.
En op toch van deure stoan
En ast doe hailmoal niks meer rokste
Din kinst weer noar binnengoan.”


Jurrie verdween en bleef moar weg,
Der was nog aal zo’n male locht
En doarom gong e nait noar binnen,
Want hai wos dat dat nait mogt.


Het duurde meester ook te laank.
Hai mos es even kieken.
Jurrie ston nog moar aal in deure.
Woarom, zol meester hail gaauw blieken.


“Staaist nog moar aal in deur mien jong?
Och jonkie, goa gaauw moar mit
Doe kinst ’t werachteg ook nait helpen
Dat buurman Loots de bere snidt!”


bron: Jeugdherinnerns van "n Muntendammer Kouvreter" geschreven door K.J. Looijenga